काठमाडौं । कान्तिपुर सेभिङ एण्ड क्रेडिट कोअपरेटिभ लिमिटेडका सञ्चालक समिति अध्यक्ष चन्द्रबहादुर तामाङ सहित १३ जनालाई प्रतिवादी बनाउँदै  करिब एक अर्ब रुपैयाँ बराबरको सम्पत्ति शुद्धीकरण (मनि लन्डरिङ०) मुद्दा दायर गरिएको छ । काठमाडौं जिल्ला सरकारी वकिल कार्यालयले मंगलबार काठमाडौं जिल्ला अदालतमा उक्त मुद्दा दायर गरेको हो ।

विभागले सहकारीमार्फत संकलित रकम विभिन्न व्यक्तिको नाममा सारेर, लगानी र सेयर कारोबारमार्फत अवैध आयलाई वैध देखाउने प्रयास गरिएको निष्कर्ष निकालेको जनाएको छ ।

सम्पत्ति शुद्धीकरण अनुसन्धान विभागका अनुसार हाल केन्द्रीय कारागार, जगन्नाथदेवल (सुन्धारा० मा थुनामा रहेका तामाङविरुद्ध ९९ करोड ८० लाख ४८ हजार रुपैयाँ बराबरको अवैध सम्पत्ति शुद्धीकरण गरेको अभियोग छ । उनी पशुपति सेभिङ कोअपरेटिभका अध्यक्षसमेत रहेको खुलेको छ ।

विभागले सम्पत्ति शुद्धीकरण (मनि लन्डरिङ) निवारण ऐन, २०६४ (संशोधनसहित) को दफा ३० बमोजिम सजायको मागदावी गरेको छ । अभियोग पत्रमा तामाङले अवैध रूपमा आर्जन गरेको चल–अचल सम्पत्ति, नगद, सेयर तथा आफ्ना पुत्र सुयोग्य तामाङको नाममा रहेको सेयर र त्यसबाट वृद्धि भएको सम्पत्तिसमेत जफत गर्न माग गरिएको छ । साथै, आठ कित्ता जग्गा, तीन लाख ३४ हजार रुपैयाँ नगद र विभिन्न कम्पनीका सेयर जफत गर्न मागदावी गरिएको छ ।

प्रकरणमा अन्य प्रतिवादीहरूबाट समेत ठूलो परिमाणमा सम्पत्ति जफतको माग गरिएको छ । विभागका अनुसार हिमालय विक्रम मल्ल ठकुरीबाट ३४ करोड १७ लाख २३ हजार, देवराज पराजुलीबाट ११ करोड ७० लाख ५४ हजार, प्रेमध्वज लामाबाट २६ करोड ८० लाख १२ हजार र जोगलाल लामाबाट ११ करोड ८३ लाख २१ हजार रुपैयाँ बराबरको चल(अचल सम्पत्ति जफत गर्न माग गरिएको छ ।

यसैगरी, सानुकान्छा लामाबाट एक करोड १८ लाख ७४ हजार, नारायण प्रसाद रिमालबाट २१ करोड ४९ लाख ८७ हजार, इन्दु थापाबाट एक करोड ६२ लाख ८ हजार, कञ्चन तामाङ लामाबाट तीन करोड ९५ लाख १५ हजार तथा उद्धव प्रसाद पाण्डेबाट तीन करोड ९२ लाख ३२ हजार रुपैयाँ बराबरको सम्पत्ति जफत गर्न मागदावी गरिएको छ ।